ہر پاکستانی کی ذمہ داری ہے کہ وہ پاکستان کو ایک سماجی، فلاحی و اقتصادی ریاست بنانے کے لیے اپنی توانائیاں صرف کرے

سینیٹر لیفٹیننٹ جنرل (ر) عبدالقیوم کا پاکستان ٹیلی ویژن کے پروگرام میں اظہار خیال

اسلام آباد ۔ (اخبارتازہ ترین۔ 25 دسمبر2017ء) پاکستان مسلم لیگ (ن) کے رہنما و سینیٹر لیفٹیننٹ جنرل (ر) عبدالقیوم نے لوگوں پر زور دیا ہے کہ وہ بانی پاکستان قائداعظم محمد علی جناح کے مقاصد کے حصول پر توجہ مرکوز کریں جو پاکستان کو ایک فلاحی ریاست بنانا چاہتے تھے۔ پیر کو پاکستان ٹیلی ویژن کے ایک پروگرام میں اظہار خیال کرتے ہوئے انہوں نے کہا کہ یہ ہر پاکستانی کی ذمہ داری ہے کہ وہ پاکستان کو ایک سماجی، فلاحی و اقتصادی ریاست بنانے کے لیے اپنی توانائیاں صرف کرے۔ قائداعظم محمد علی جناح کی ایک آزاد و خودمختار ریاست کے لیے جدوجہد پر تبصرہ کرتے ہوئے انہوں نے کہا کہ قائداعظم نے وفاق کے زیرانتظام صوبوں کی خودمختاری، اقلیتوں کے حقوق، شمال مغربی صوبوں کی ترقی سمیت موجودہ خیبرپختونخواہ اور بلوچستان کی ترقی کی بھی بات کی۔ بانی پاکستان قائداعظم محمد علی جناح کی خوبیوں اور صلاحیتوں کی تعریف کرتے ہوئے سینیٹر عبدالقیوم کا کہنا تھا کہ قائداعظم نے ایک علیحدہ اور آزاد ریاست کے حصول کے لیے اپنی تمام تر توانائیاں صرف کیں اور انتھک محنت کی۔ انہوں نے کہا کہ قائداعظم نے تمام ممالک کے ساتھ بہتر تعلقات کے قیام کی بھی بات کی۔ قوم کے نام اپنے پیغام میں انہوں نے کہا کہ ہمیں اپنے قائد اور بانی پاکستان کے مقاصد کے حصول پر توجہ مرکوز کرنی چاہیئے اور پاکستان کو ایک سماجی، فلاحی و اقتصادی ریاست بنانے کے لیے کام کرنا چاہیئے۔